Manchester United og Barcelona munu samkvæmt enskum miðlum hefja nýjar viðræður í næstu viku um framtíð Marcus Rashford. Barcelona vill halda enska framherjanum eftir gott tímabil hans hjá félaginu á láni.
Rashford vakti mikla athygli um síðustu helgi þegar hann skoraði glæsilegt aukaspyrnumark í sigri Barcelona á Real Madrid í El Clásico. Sigurinn tryggði katalónska liðinu spænska meistaratitilinn og Rashford hefur átt stóran þátt í góðu gengi liðsins síðustu mánuði.
Barcelona er sagt vilja finna leið til að semja við Manchester United um áframhaldandi dvöl leikmannsins, annað hvort með varanlegum kaupum eða nýjum lánssamningi.
Framtíð Rashford á Old Trafford hefur verið óljós um tíma og talið er að bæði félögin vilji finna lausn áður en undirbúningur fyrir næsta tímabil hefst.
Hinn 28 ára gamli framherji hefur endurheimt sjálfstraust sitt á Spáni eftir erfið tímabil hjá Manchester United og stuðningsmenn Barcelona vilja sjá hann áfram hjá félaginu.
