Michael Carrick er samkvæmt helstu miðlum að öllum líkindum að hreppa stjórastarfið hjá Manchester United til frambúðar.
Yfirmenn félagsins, eins og Omar Berrada framkvæmdastjóri og Jason Wilcox yfirmaður knattspyrnumála, eru sagðir ætla að mæla með Carrick við eigandann Sir Jim Ratcliffe á næstu dögum.
Carrick hefur stýrt United sem bráðabirgðastjóri frá því Ruben Amorim var rekinn í janúar og náð frábærum árangri. United hefur unnið tíu af fimmtán leikjum undir hans stjórn og tryggt sér sæti í Meistaradeildinni á ný.
Ekkert lið hefur tekið fleiri stig í ensku úrvalsdeildinni frá því Carrick tók við 13. janúar, en United hefur meðal annars unnið Arsenal, Manchester City, Chelsea og Liverpool á tímabilinu.
Carrick hefur einnig fengið mikið hrós innan félagsins fyrir vinnu sína með ungum leikmönnum og langtíma hugsun. Samkvæmt fréttum vilja margir leikmenn félagsins einnig sjá hann fá starfið til frambúðar.
