Atlético Madrid hefur látið í ljós mikla óánægju með bæði leikmenn Arsenal og dómgæslu eftir að spænska liðið féll úr leik í Meistaradeildinni í vikunni.
Lið Diego Simeone tapaði 1-0 í síðari leik liðanna í London og datt þar með út úr keppninni. Stemningin var afar heit undir lok leiksins og átti Simeone í orðaskiptum við íþróttastjóra Arsenal, Andrea Berta, þar sem hann ýtti við honum.
Þrátt fyrir það var Simeone hófstilltur í viðtölum eftir leik og sagðist ekki vilja leita afsakana. Samkvæmt spænska miðlinum AS er þó önnur saga á bak við tjöldin, þar sem félagið telur sig hafa verið beitt rangindum frá upphafi ferðarinnar til Englands.
Gabriel Martinelli throwing the ball into the crowd, before it is passed to Kepa Arrizabalaga who boots it away onto the pitch… ❤️🤣
🎥 @Helen1lucas pic.twitter.com/IrcEv9sbWi
— DailyAFC (@DailyAFC) May 5, 2026
Stuðningsmenn Arsenal hófu leikinn utan vallar með því að skjóta upp flugeldum fyrir utan hótel Atlético um nóttina, sem talið er hafa truflað undirbúning liðsins. Þá voru einnig efasemdir um val á dómurum, en Daniel Siebert dæmdi leikinn og Bastian Dankert sá um VAR.
Atlético telur einnig að Arsenal hafi beitt „óheiðarlegum aðferðum“ í aðdraganda leiksins og gagnrýndi hegðun leikmanna í uppbótartíma, þar sem Gabriel Martinelli var sakaður um að tefja leik.
Spænska liðið er sérstaklega ósátt við þrjú atvik inni í teig sem ekki voru dæmd víti, þar á meðal þegar Riccardo Calafiori átti að hafa brotið á Giuliano Simeone.
Atlético íhugar nú að leggja fram formlega kvörtun til UEFA vegna málsins.
