Tvö lið eru enn taplaus í Lengjudeild karla en heil umferð var spiluð í dag og var nóg um að vera í þeim viðureignum.

ÍR er enn á toppnum með 15 stig eftir sjö leiki en liðið mætti Þór Akureyri og gerði 1-1 jafntefli þar sem tvö rauð spjöld fóru á loft.

ÍR tók forystuna snemma leiks eða á 18. mínútu en stuttu eftir það fékk Marc McAusland beint rautt spjald og voru gestirnir manni færri í um 70 mínútur.

Þórsurum tókst að jafna á 73. mínútu en endaði leikinn einnig manni færri eftir rauða spjald Orra Sigurjónssonar stuttu eftir að hafa jafnað.

Njarðvík er að sama skapi taplaust eftir 2-2 jafntefli við Þrótt en það fyrrnefnda er í öðru sætinu með 13 stig – Þróttur er í því fimmta með 11.

Það gengur afskaplega illa hjá Fjölnismönnum sem fékk Selfoss í heimsókn en gestirnir unnu þann leik 0-2 og eru heimamenn á botninum án sigurs eftir sjö leiki.

Keflavík og Fylkir gerðu þá 1-1 jafntefli, Leiknir vann Völsung 3-1 og Grindavík hafði betur gegn HK, 2-1.