Ruben Amorim, stjóri Manchester United, er sagður pirraður á hve lítið er að frétta í leikmannamálum félagsins í sumarglugganum.

United fékk Matheus Cunha frá Wolves á dögunum en hafa menn eins og Bryan Mbuemo, Hugo Ekitike og Viktor Gyokeres einnig verið orðaðir við félagið.

Það virðist þó ganga hægt að landa fleirum, en Mbuemo, sem er mála hjá Brentford, virtist vera á leiðinni fyrir þó nokkru síðan.

Amorim hefur tekið það skýrt fram við stjórn félagsins að hann þurfi að fá nýju leikmenn sína inn áður en félagið heldur í æfingaferð til Bandaríkjanna eftir um mánuð.

Þá vill hann einnig að United losi sig við leikmenn sem hann sér ekki not fyrir. Þar má nefna Marcus Rashford, Jadon Sancho, Alejandro Garnacho og Antony.

Það gengur þó eitthvað brösulega einnig. Rashford vill fara til Barcelona og ekki er víst hvort það gangi. Napoli hefur áhuga á Sancho og Garnacho en telur verðmat United á þeim of hátt. Antony hefur verið orðaður við Real Betis, þar sem hann var á láni á síðustu leiktíð.

United átti versta tímabil sitt í meira en hálfa öld og hafnaði í 15. sæti ensku úrvalsdeildarinnar. Það er því pressa á Amorim og stjórninni að gera miklu betur á næstu leiktíð.