Gennaro Gattuso, goðsögn AC Milan, myndi ekki velja sjálfan sig í ítalska landsliðið í dag en hann var nýlega ráðinn landsliðsþjálfari Ítalíu.

Gattuso var flottur leikmaður á sínum tíma en hann var afskaplega duglegur miðjumaður sem var þó ansi skapmikill á velli.

Þessi fyrrum miðjumaður var kannski ekki sá besti á boltanum í Milan eða landsliðinu á sínum leikmannaferli og viðurkennir fúslega að hann myndi ekki endilega henta nútíma fótbolta.

,,Þeir sögðu mér að segja þetta ekki en ég skal segja það sem ég hugsa. Í dag myndi ég ekki setja Gattuso á völlinn í mínu liði, miðað við öll þau vandræði sem ég skapaði,“ sagði Gattuso.

,,Hvernig fótboltinn er í dag, ég veit hvernig fótbolta mér líkar við. Þú þarft að ná til leikmanna og hausinn á þeim er alls ekki eins. Fótboltamenn eru öðruvísi í dag, þeir eru miklu meiri atvinnumenn og vinna saman, ekki bara í landsliðinu.“