Wolves gæti þurft að berjast fyrir því að halda stjóra sínum, Portúgalanum Vitor Pereira, í sumar. Áhugi er frá heimalandi hans.

Pereira tók við um mitt síðasta tímabil, er Wolves var í fallbaráttu, og gerði flotta hluti eftir áramót. Liðið var í fallsæti ensku úrvalsdeildarinnar er hann tók við en vann það 10 af 22 leikjum undir hans stjórn og tryggði sæti sitt í deildinni örugglega að lokum.

Benfica horfir nú til hans, en félagið skoðar það að losa sig við Bruno Lage eftir HM félagsliða sem nú stendur yfir. Gengið þar gæti einnig haft áhrif, en liðið mætir Bayern Munchen, Boca Juniors og Auckland City í riðlakeppninni.

Benfica hafnaði í öðru sæti portúgölsku úrvalsdeildarinnar á leiktíðinni, tveimur stigum á eftir toppliði Sporting. Liðið er því á leið í umspil um sæti í deildarkeppni Meistaradeildarinnar í ágúst.