Kristján Óli Sigurðsson spekingur Þungavigtarinnar var ekki sáttur með dómgæsluna í leik Fram og FH í Bestu deild karla í gær.

Kristján var mættur í stúkuna á Lambhagavöllinn þar sem Fram vann 2-0 sigur, umdeilt atvik átti sér stað undir lok fyrri hálfleiks.

Helgi Mikael Jónasson var á flautunni og Elías Ingi Árnason var fjórði dómarinn.

„Ég lét dómarann heyra, þeir áttu það skilið. Það er ótrúlegt atvik í lok fyrri hálfleiks, Viktor Freyr markvörður Fram kýlir Sigurð Bjart niður í teignum. Helgi lokar augunum og flautar til hálfleiks,“ sagði Kristján í Þungavigtinni í dag.

Hann vildi einnig skella skuldinni á fjórða dómarann og beindi orðum sínum að Ríkharð Óskari Guðnasyni sem er aðalmaðurinn á FM957 þar sem Elías starfaði áður.

„Elli FM, fáðu hann til að vera DJ hér á laugardagskvöldum því hann var fjórði dómari og sá þetta líka. Ég lét þá heyra það í hálfleik. Gæslan ætlaði að henda mér út í hálfleik en þorðu því ekki.“

Kristján vildi svo meina að Helgi Mikael ætti ekki að dæma í efstu deild og taldi Twana Khalid Ahmed vera í sama flokki.