KSÍ myndaði á dögunum starfshóp sem mun leggjast yfir það hvernig nýtt fyrirkomulag í Bestu deild karla, sem tekið var í gildi árið 2022, hefur til tekist. Þetta kemur fram í fundargerð frá fundi stjórnar KSÍ upp úr miðjum síðasta mánuði og var gerð opinber í gær.

Eins og flestum er kunnugt hefur deildinni undanfarin ár verið skipt upp í tvo hluta að loknu hinu hefnbundna 22 leikja móti, þar sem liðin spila einu sinni til viðbótar við öll liðin í sínum hluta, alls fimm leikir til viðbótar.

Eins og með allt annað eru skiptar skoðanir á þessu og rök með og á móti. Hópurinn mun koma til með að greina hvernig þetta allt saman hefur gengið undanfarin fjögur tímabil, að þessu meðtöldu.

Starfshópurinn inniheldur níu menn og eru þeir héðan og þaðan úr knattspyrnuheiminum, til að mynda úr herbúðum KSÍ, félaganna og fjölmiðla, eins og í tileflli Jóhanns Más Helgasonar hlaðvarpsstjörnu og Eiríks Stefáns Ásgeirssonar hjá Sýn.

Starfshópurinn
Börkur Edvardsson (formaður) – Stjórn KSÍ
Birgir Jóhannsson ÍTF
Birkir Sveinsson KSÍ
Eiríkur Stefán Ásgeirsson – Forstöðumaður íþróttadeildar Sýnar
Guðni Hreinsson – KA
Ívar Pétursson – Vestri
Jóhann Már Helgason – Hlaðvarpsstjórnandi
Kári Árnason – Víkingur R.
Magnús Sigurðsson – ÍBV

Þess má geta að KSÍ og ÍTF hafa einnig sett saman starfshóp sem á að rýna í umgjörð og aðsókn leikja í Bestu deildum karla og kvenna, sem og Lengjudeildum.

Starfshópurinn
Máni Pétursson (formaður) – Stjórn KSÍ
Stefán Sveinn Gunnarsson – KSÍ
Björn Þór Ingason – ÍTF
Guðbjörg Ýr Hilmarsdóttir – Höfundur upplifunarhandbókar
Agnar Freyr Gunnarsson – Afturelding
Garðar Ingi Leifsson – FH
Ragna Björg  – Breiðablik
Pála Þórisdóttir – Þróttur
Elsa Jakobsdóttir – Fylkir