Romelu Lukaku hefur greint frá því að hann og bróðir hans, Jordan, hafi verið beittir fjárkúgun af fólki sem neitar að afhenda lík föður þeirra svo hægt sé að halda útför hans í Belgíu.

Samkvæmt Lukaku munu bræðurnir því ekki geta lagt föður sinn til hinstu hvílu, eins og þeir höfðu vonast til.

Faðir þeirra, Roger Lukaku, fyrrverandi leikmaður landsliðs Zaire nú Lýðveldisins Kongó sem lauk ferli sínum í Belgíu, lést 58 ára að aldri í síðasta mánuði.

Í hjartnæmri yfirlýsingu sem Romelu birti á Instagram sagði hann: „Eins og margir vita áttum við að halda jarðarför föður okkar á föstudaginn, en vegna ákveðinna ákvarðana sem teknar voru í Kinshasa, höfuðborg Kongó, mun útförin fara fram þar,“ segir Lukaku.

„Faðir okkar lést 28. september og við bræður reyndum allt til að koma lík hans aftur til Evrópu, en við upplifðum að fólk væri að reyna að kúga okkur fjárhagslega.“

„Ef faðir okkar væri hér í dag myndi hann aldrei samþykkja þetta. Það brýtur hjörtu okkar að geta ekki lagt hann til hinstu hvílu, en sumir vildu einfaldlega ekki leyfa það.“

Lukaku bætti við: „Nú skiljum við hvers vegna pabbi hélt okkur frá mörgu fólki. Guð blessi sál þína.“

Knattspyrnufélagið Anderlecht heiðraði minningu Roger Lukaku nýlega með mynd af honum á skjá fyrir leik gegn Standard Liège.