Manchester United goðsögnin Ruud van Nistelrooy viðurkennir að hafa sárnað það að hafa þurft að yfirgefa félagið á dögunum.

Nistelrooy gerðist aðstoðarmaður Erik ten Hag hjá United í sumar en eftir að sá síðarnefndi var rekinn tók hann við sem stjóri til bráðabirgða. Þegar Ruben Amorim tók svo við United á dögunum óskaði hann krafta Nistelrooy ekki áfram.

„Þegar ég tók við til bráðabirgða sagði ég að ég vildi hjálpa United og vera áfram til að gera það. Svo ég var mjög vonsvikinn og sár yfir að þurfa að fara,“ segir Nistelrooy.

„United er eina félagið sem ég hefði tekið að mér að vera aðstoðarmaður hjá vegna tengingarinnar við félagið og stuðningsmenn. En ég skil líka nýjan stjóra, ég hef verið í fótbolta lengi. Samtal mitt við Ruben var gott og það hjálpaði mér mikið að halda áfram og taka strax næsta skref.“

Nistelrooy þurfti þó ekki að bíða lengi eftir að landa næsta starfi en hann tók við sem stjóri Leicester af Steve Cooper.