Ítalska goðsögnin Antonio Cassano fékk víst skilaboð frá portúgölsku goðsögninni Cristiano Ronaldo eftir að sá fyrrnefndi hafði valið tíu bestu leikmenn sögunnar.

Það var ekkert pláss fyrir Ronaldo á lista Cassano sem virðist hafa farið í taugarnar á þeim portúgalska.

Cassano segir að Ronaldo hafi sent sér nokkur skilaboð eftir að hafa séð fréttir af málinu og var virkilega ósáttur með valið.

,,Ég sagði að brasilíski Ronaldo væri númer eitt. Cristiano kemst ekki á topp tíu listann minn því gæði leikmanns eru annað en að skora mörk,“ sagði Cassano.

,,Eftir það þá fæ ég skilaboð frá númeri á Spáni og þar fæ ég lista yfir bikara og tölfræði. Hann sendi mér einnig hljóðskilaboð.“

,,Hann sagði við mig: ‘Þú vanvirtir mig, ekki gera það aftur. Þú skoraðir bara 150 mörk og vannst fjóra bikara.’

,,Ég svaraði honum og sagðist einfaldlega ekki vera hrifinn af honum sem leikmanni, hvert er vandamálið? Hann tók sér tíma í að senda mér skilaboð… Ímyndiði ykkur það.“