Helgi Fannar Sigurðsson skrifar frá Munchen
Sævar Atli Magnússon telur að leikur íslenska landsliðsins við það bosníska á fimmtudag muni ráðast á smáatriðum. Hann er þó vongóður um að Ísland standi uppi sem sigurvegari.
Um fyrsta leik liðanna í undankeppni EM 2024 er að ræða. Hann fer fram í Zenica í Bosníu. Auk Íslands og Bosníu eru í undanriðlinum Portúgal, Slóvakía, Lúxemborg og Liecthenstein.
Íslenska liðið æfir nú í Munchen en ferðast til Bosníu fyrir leikinn á fimmtudag.
„Mér líst hrikalega vel á þetta. Þetta verður áhugaverður leikur að því leyti að þetta er fyrsti leikur hjá nýjum þjálfara hjá þeim. Við vitum ekki enn hvernig völlurinn er og þurfum að vera klókir,“ segir Sævar Atli Magnússon í aðdraganda leiksins við Bosníu.
Hann er nýr í íslenska landsliðinu og er að spila sínu fyrstu keppnisleiki í komandi verkefnu, að því gefnu að hann komi við sögu.
„Þjálfarinn getur valið úr öllum leikmönnum á Íslandi svo ég er mjög glaður að vera hérna. Það er heiður og ég ætla að nýta þetta til hins ýtrasta.“
Sævar fékk rosalegan skurð á dögunum í leik gegn Horsens í dönsku úrvalsdeildinni, en hann er á mála hjá Lyngby.
„Þeir eru þekktir fyrir að fara 100% í hvert einasta návígi. Það kom 50/50 bolti, eða í raun 70/30 fyrir mig. Boltinn fer upp í loft, ég stend kyrr, sé hann út undan mér svona þremur metrum frá mér. Ég stend upp, sé hann koma á fleygiferð. Ég var ekki að fara að bakka út úr þessu einvígi, það er ekki í boði. Þannig ég skalla á móti og skalla hann í hnakkann. Ég fæ mikinn verk, leggst niður, ætlaði að standa upp en sé að það fossblæðir. Þá hugsaði ég: Jæja, þetta getur ekki verið gott. Ég er feginn að hafa ekki fengið heilahristing.
Ég hugsaði: Andskotinn, er ég að fara út af núna og missa af landsleikjunum?“
Sævar er bjartsýnn á að íslenska liðið hefji undankeppni EM af krafti með góðum úrslitum í Bosníu á fimmtudag.
„Við vitum ekki alveg við hverju við eigum að búast við en þegar ég horfi á liðið og hópinn sem við erum með þá tel ég okkur eiga góða möguleika. Ég held að þetta muni snúast um einhver ein, tvö mistök öðru hvoru megin. Ég trúi því að þetta muni detta okkur í hag.
Það eru margir að spila vel. Menn eru spila vel með sínum liðum og sjálfstraust er það mikilvægasta í fótbolta. Það er góð blanda í hópnum og mér líst hrikalega vel á þetta.“
