Federico Chiesa, leikmaður Ítalíu, viðurkennir að hann hafi átt erfitt með að heyra í Luciano Spalletti á laugardag.
Spalletti er þjálfari Ítalíu en hann öskraði og öskraði á hliðarlínunni í sigri á Albaníu.
Chiesa heyrði varla hvað Spalletti var að segja en stemningin í þessum leik var gríðarleg og létu stuðningsmenn vel í sér heyra.
,,Hann vill sjá stöðugleika varðandi spilamennsku og hreyfingar. Hann vill hafa stjórn á leiknum og hann hefur sagt það alveg frá byrjun,“ sagði Chiesa.
,,Það er það sem við reyndum að sýna á vellinum. Hann gaf okkur ráð en að heyra í honum á vellinum var ansi erfitt. Andrúmsloftið var rosalegt, stórkostlegt.“
,,Jafnvel þó að Ítalarnir hafi ekki verið í yfirtölu var þessi upplifun frábær.“
