Mauricio Pochettino, stjóri Chelsea, hefur staðfest það að félagið ætli ekki að nota sóknarmanninn Christopher Nkunku á vængnum í vetur.

Nkunku er nýbúinn að jafna sig eftir meiðsli og er hægt og rólega að komast í byrjunarlið Chelsea en hann stóð sig afskaplega vel á undirbúningstímabilinu fyrir meiðslin.

Nicolas Jackson á í hættu á að missa sæti sitt sem nía Chelsea miðað við orð Pochettino en Nkunku er vel nothæfur þar að sögn Poch.

Jackson var alls ekki góður í 2-1 tapi gegn Wolves á dögunum og gæti þurft að sætta sig við bekkjarsetu í næstu leikjum.

,,Eins og er þá er Nkunku að jafna sig af meiðslum, besta staðan hans er í tíunni eða þá í níunni frekar en að spila á vængnum,“ sagði Poch.

,,Hann er að byrja að skilja ensku úrvalsdeildina og skilur það að liðin hér sýna meiri ákefð og þetta er öðruvísi en í öðrum löndum.“

,,Það er gott að hann sé að læra og að hann sé að fá fleiri mínútur. Hann mun aðlagast með tímanum en ef hann byrjar að skora mörk þá lærir hann hraðar.“