Reynir Leósson lék um árabil með ÍA en það var ekki alltaf dans á rósum. Hann var gestur í nýjasta þætti hlaðvarpsins Chat After Dark.

Reynir var ansi öflugur varnarmaður fyrir Skagamenn og var til að mynda hluti af liðinu sem varð Íslandsmeistari 2001.

Í þættinum var hann spurður út í fótboltamenninguna á Akranesi.

„Fótboltinn er rótgróinn í menningunni þarna og var mjög stór hluti af þessu bæjarfélagi. Bæjarsálin sveiflaðist svolítið eftir því hvernig gekk í boltanum,“ segir Reynir.

„Þú varst ekkert að mæta í bakaríið daginn eftir tapleik?“ skaut þáttastjórnandi inn í.

„Nei. Maður bara læddist með veggjum. Þú fékkst að heyra það. Þess vegna var smá frelsun þegar maður gat búið annars staðar,“ svaraði Reynir léttur.

Hann rifjaði upp sögu máli sínu til stuðnings.

„Við mættum einu sinni U23 ára liði KR í bikarnum. Þar mæta menn eins og Eiður Smári, sem var kominn í KR. Þeir stilltu upp öflugu liði en samt ungmennaliði. Og þeir slógu okkur út, aðallið ÍA. Þetta var algjörlega hræðilegt og ég veit ekki af hverju ég er að minnast á þetta því þetta var eiginlega gleymt.“