Heimir Guðjónsson er komin heim í Kaplakrika og mun stýra FH í annað sinn á ferlinum, stuðningsmenn FH eru spenntir fyrir að sjá þennan farsæla þjálfara reyna að rétta við skipið en FH var nálægt því að falla úr Bestu deildinni á síðustu leiktíð. „Markmiðið er efri hlutinn, maður þarf að setja sér markmið og fyrsta markmiðið okkar er að koma okkur í efri hlutann. Við gerum okkur samt sem áður grein fyrir því að við erum með lið í mótun. Við erum að smíða saman gott lið sem getur verið samkeppnishæft og við verðum að gefa því tíma,“ segir Heimir um stöðu mála við 433.is.

Hann er ánægður með hvernig tekist hefur til í undirbúningi fyrir mótið og segir enga leikmenn væntanlega í FH. „Við erum sáttir með veturinn, undirbúningstímabilin eru samt þannig að stundum eru góð úrslit og slæm úrslit eins og gegn ÍBV þar sem við fáum á okkur fimm mörk. Við þurfum að finna góðan stöðugleika í leik liðsins í sumar.“

Eins og staðan er í dag erum við ánægðir með leikmannahópinn, menn hafa æft vel og verið duglegir. Dagarnir fyrir mót fara í það leggja lokahönd á þetta til að vera klárir í fyrsta leik gegn Fram.“

Heimir segist vera komin með það á hreint hvernig byrjunarlið FH lítur út í upphafi móts. „Við erum komnir með það nokkuð á hreint hvernig við viljum byrja mótið.“

Heimir fór með stórleik í auglýsingu fyrir mótið þar sem bræðurnir Viðar Halldórsson og Jón Rúnar Halldórsson léku með honum. „Þetta var bara gaman, skemmtileg auglýsing og flott framtak. Fyrir mig var þetta bara ein taka, þeir voru að fara út fyrir kassann og þetta reyndi á bræðurna. Á endanum stóðu þeir sig vel,“ segir Heimir léttur.