Bjarni Benediktsson, fjármálaráðherra og formaður Sjálfstæðisflokksins, kom í Íþróttavikuna með Benna Bó sem sýnd er á Hringbraut á föstudagskvöldum. Gestur með honum var sjálfur Hjörvar Hafliðason, Dr. Football.

Málefni Laugardalsins bar á góma en eins og alþjóð veit eru íslenska landsliðin að spila í elstu þjóðarhöll Evrópu og á einhverjum elsta þjóðarleikvangi álfunnar. Margt hefur verið ritað og rætt og spurði Benedikt Bóas, þáttarstjórnandi, hvort það væri verið að fara taka upp hamar og nagla í bráð.

„Það sem ég hef verið að kalla eftir er að menn nái niðurstöðu um hlutverk hvers og eins. Það er alls ekki sjálfgefið að ríkið komi að því að reka svona mannvirki. Við erum ekki að því í dag.

Helst hefði ég viljað að ríkið kæmi með einhverja tiltekna krónutölu og framlag. Þetta er í vinnslu og ráðherra íþróttamála hefur verið að leiða þetta samtal við borgina. Við höfum metnað til að gera þetta vel en þau mega heldur ekkert klikka.

Spurningin er hversu mikið Reykjavíkurborg sjálf leggur áherslu á að taka þátt og vera með eðlilegan hlut í þessu því mér finnst það svolítið óljóst,“ sagði Bjarni.

Halli Reykjavíkurborgar er mikill og varla séð að borgin ráði við að vera hluti af svo stórri fjárfestingu. „Þetta er ekkert svo stórt verkefni að menn leysa það ekki. Það er mín skoðun. Þetta er verkefni sem þú ferð sjaldan í og horfir til áratuga. Menn eiga að gera þetta af metnaði þegar farið verður af stað.“

Hjörvar spurði hvort þessi mannvirki verði að vera í Laugardalnum. Hvort það væri hægt að fara með þetta annað og tók sem dæmi í Kópavog og benti á að eitt skemmtilegasta vallarstæði væri í Kaplakrika. „Eina sem ég vil ekki er kleinuhringjavöllur. Ég vil fjórar stúkur,“ sagði hann ákveðinn.

Bjarni sagði að það væri ekki greypt í stein að Íþróttamannvirki væru í Laugardal. „Þar er rými og það er saga og þetta er höfuðborgin og þetta er ákveðin miðstöð. Þarna eru sérsamböndin og það er eðlilegt að maður horfi til þess.

En mér finnst að þetta mál megi ekki dragast mikið lengur af því það næst ekki samkomulag við Reykjavíkurborg um eðlilega aðkomu. Það finnst mér ekki. Að minnsta kosti ætti að skoða hvort aðrar leiðir eru færar. Þetta er sá farvegur sem málið er í augnablikinu og það verður eflaust margt að frétta á næstu mánuðum.“