Davíð Smári Lamude nýr þjálfari Vestra í Lengjudeild karla var gestur í íþróttavikunni hjá Benna Bó á Hringbraut á föstudagskvöld.

Davíð hefur síðustu ár unnið magnað starf hjá Kórdrengjum og komið liðinu upp úr neðstu deild upp í næst efstu deild. Eftir gott starf þar ákvað hann að taka skrefið til Vestra á Ísafirði.

„Mér finnst ég hafa gefið Kórdrengjum allt sem ég á, þennan tíma sem ég var þar. Það er mikið álag að vera með lið í næst efstu deild með fáa í kringum sig. Mig langar að segja, því þið og fleiri hafi talað um að ég sé andlit Kórdrengja. Og það má vel vera, en það er þarna fólk á bak við sem hefur lagt gríðarlega á sig. Þeir sem eru þarna hafa lagt mikið á sig,“ sagði Davíð um þá sem eru í stjórn félagsins og koma að því.

Kórdrengir eru ekki eins og öll önnur félög í Lengjudeildinni með heilt félag á bak við sig þar sem eru yngir flokkar og fleira í þeim dúr. Ævintýraþrá og samstaða vina hefur búið til eina ótrúlegustu sögu sem heyrst hefur í íslenskum fótbolta. Davíð hafði átt þátt í því að stofna Kórdrengi þegar liðið kom inn í fjórðu og neðstu deild hér á landi. Liðið var í tvö ár í þeirri deild en fór svo upp um þrjár deildir á þremur árum.

„Ég vil að það komi fram að ég er ekki einn á bak við þetta. Ég er gríðarlega stoltur af þessu, planið var alltaf að koma liðinu upp í Lengjudeildina. Ef ég myndi sjá þetta öfugt núna og upplifa Lengjudeldina, þá hefði mér ekki dottið í hug að þetta yrði. Maður hafði trú á þessu, við erum komnir þangað. Þetta hefur verið mikið ævintýri og mikið gengið á. Ég er mjög stoltur af þessu, allir sem hafa tekið átt í þessu geta verið mjög stoltir. Félagið er allt öðruvísi en önnur félög, leikmenn hafa lagt á sig gríðarlega mikla vinnu.“

Félagið hefur nú fasta búsetu í Safamýri en hefur síðustu ár flakkað á milli valla til að redda sér æfingatíma.

„Við vorum að eiga við mikið aðstöðuleysi, heimvallaleysi. Á þessu ári fengum við heimavöll í áttundu umferð, við gátum ekkert æft á okkar velli eða verið með klefa. Við fengum það í áttundu umferð, hvernig leikmenn tóku á því er ótrúlegt. Við vorum með æfingaplan einn dag í einu, við áttum að komast í Safamýri þegar Fram færi og það seinkaði. Við vorum aðstöðulausir sem það dróst. Við höfðum ekki æfingaplan nema einn dag í einu, maður sendi stundum samdægurs hvar æfingin yrði. Ég er stoltur af félaginu eftir þennan tíma, ég hef aldrei verið eins stoltur og á þessu tímabili.“

Umræðan er hér að neðan.