Sjúkrabíll var kallaður til í Fagralundi í Kópavogi í kvöld þegar Augnablik og KH áttust við í 3 deild karla í knattspyrnu. Tómas Meyer dómari leiksins rotaðist þegar boltanum var spyrnt beint í höfuð hans.
Leikmönnum beggja liða var verulega brugðið þegar Tómas rotaðist en boltinn fór í andlit hans af stuttu færi þegar verið var að taka aukaspyrnu.
Sjúkrabíll var kallaður á staðinn en leikmenn liðanna voru að fara að hefja endurlífgun þegar Tómas rankaði við sér og hóf að anda á nýjan leik.
Atvikið átti sér stað á 50 mínútu leiksins, sjúkrabíllinn sótti Tómas sem nú dvelur á sjúkrahúsi þar sem fylgst er með líðan hans.
Tómas hefur mikið dæmt í neðri deildum síðustu ár og fengið mikið lof fyrir frammistöðu sína en leiknum lauk með 2-1 sigri KH. Til að klára leikinn tók aðstoðardómari við flautunni og ungur leikmaður Breiðabliks var aðstoðardómari restina af leiknum.