Aaron Ramsdale tók eftir ummælum Brendan Rodgers á síðustu leiktíð er hann var kallaður besti markmaður Englands eftir góða frammistöðu með Arsenal.

Rodgers er stjóri Leicester City í ensku úrvalsdeildinni og er mikill aðdáandi Ramsdale sem er ekki númer eitt hjá Englandi heldur er það Jordan Pickford, markvörður Everton.

Ramsdale gefur lítið fyrir þessi ummæli Rodgers og hefði mun frekar vilja heyra þau frá Gareth Southgate, landsliðsþjálfara Englands.

Það verður hart barist um markmannsstöðurnar hjá enska landsliðinu í vetur sem mun spila á HM í Katar í lok árs.

,,Ég sá aldrei þetta viðtal svo þetta var örugglega tveimur dögum seinna þegar strákarnir í búningsklefanum spurðu hvort ég hefði séð það sem Brendan sagði,“ sagði Ramsdale.

,,Málið var að þetta voru ekki orð enska landsliðsþjálfarans. Ég þurfti enn að sanna mig fyrir honum og það er enn langt í land. Ég hef fengið að spila fyrir England en hlutirnir breytast mjög fljótt.“

,,Á þessu tímabili verða þetta ég, Jordan Pickford, Sam Hohnstone, Dean Henderson, Nick Pope og örugglega aðrir. Það verða fimm eða sex enskir markmenn sem vilja komast til Katar.“