Nú þegar enska úrvalsdeildin fer að klárast þá líður að því að besti leikmaður deildarinnar verði valinn. Kevin DeBruyne var valinn leikmaður ársins í fyrra. Daily Mail birti lista þar sem farið var yfir þá sem eru líklegastir í ár. Þrír leikmenn Manchester City eru á listanum og þá kemst einn leikmaður Englandsmeistara Liverpool á listann.

Listann má sjá hér að neðan:

Ilkay Gundogan
Gundogan hefur verið algjörlega frábær í geggjuðu liði Manchester City. Hann er kominn með 12 mörk í deildinni sem er persónulegt met fyrir hann. Hann hefur verið hjartað í sóknarleik City í deildinni í vetur og hefur valdið usla í vörn andstæðinganna trekk í trekk.

Harry Kane
Gengi Tottenham hefur kannski ekki verið upp á marga fiska í vetur en Harry Kane er að eiga eitt af sínum bestu tímabilum hingað til. Hann leiðir kapphlaupið um gullskóinn með 21 mark og er líka með flestar stoðsendingar í deildinni eða 13 talsins. Enginn leikmaður hefur komið að jafn mörgum mörkum og Kane í vetur. Þá er Tottenham enn í baráttunni um Meistaradeildarsæti.

Bruno Fernandes
Bruno hefur verið frábær í vetur og skorar reglulega en hann er kominn með 16 mörk í deildinni. Það hefur þó aðeins dregið úr markaskorun hjá kappanum á seinni hluta tímabilsins. Hann hefur verið virkilega stöðugur og hefur oft komið liði sínu til bjargar í vetur.

Ruben Dias
Það er engum blöðum að fletta um það að Ruben Dias hefur verið frábær og einn besti miðvörður deildarinnar í vetur. Eftir komu hans frá Benfica í sumar hefur hann átt fast sæti í liðinu og City virðast loksins búnir að finna nýjan Vincent Kompany. Dias hefur haldið hreinu í helming þeirra leikja sem hann hefur spilað.

Mohamed Salah
Salah vann til verðlaunanna árið 2018 og gæti verið að hann hreppi þau aftur í ár. Liverpool liðið hefur verið langt undir væntingum en Salah hefur verið ljósið í myrkrinu fyrir stuðningsmenn. Salah er annar í kapphlaupinu um gullskóinn og er kominn með 20 mörk úr deildinni.

Kevin DeBruyne
Við skulum ekki gleyma handhafa verðlaunanna í fyrra. Hann hefur kannski ekki skorað jafn mikið og hann gerði á síðasta tímabili en hann er ennþá jafn mikilvægur fyrir liðið og getur sundurspilað vörn andstæðinganna. Hann hefur skorað 6 mörk í deildinni og gefið 11 stoðsendingar.

Jack Grealish
Jack Grealish er eini leikmaðurinn á listanum utan „stóru sex“ liðanna í ár. Hann hefur heillað knattspyrnuáhugamenn í vetur og látið stuðningsmenn Aston Villa dreyma um Meistaradeildarsæti. Hann er kominn með 6 mörk í deildinni og hefur gefið 12 stoðsendingar.