Daníel Geir Mortiz formaður knattspyrnudeildar ÍBV veit ekki hvort enski framherjinn Gary Martin sé enn staddur í Vestmannaeyjum. Greint var frá því fyrir skömmu að ÍBV hefði rifti samningi við enska framherjann.

Í tilkynningu Eyjamanna segir að enski framherjinn hafi framið agabrot en ekki er nánar greint frá því hvað gerðist.

„Það sem við getum sagt kemur fram í yfirlýsingunni , ég er ekki alveg viss hvort hann sé enn staddur í Vestmannaeyjum,“ sagði Daníel í samtali við 433.is í dag.

Þegar Daníel var spurður að því hvort um væri að ræða eitt agabrot eða eitthvað uppsafnað svaraði hann. „Ég get ekki tjáð mig eitthvað meira um þetta mál.“

Ljóst er að um mikla blóðtöku er fyrir ÍBV innan vallar en enski framherjinn hefur raðað inn mörkum fyrir félagið í eitt og hálft tímabil. Liðið leikur undir stjórn Helga Sigurðssonar í Lengjudeild karla og stefnir liðið upp í efstu deild.

Gary Martin gekk í raðir ÍBV sumarið 2019 eftir að samningi hans við Val var rift, þá hafði hann lent upp á kannt við Ólaf Jóhannesson þá þjálfara Vals.

Enski framherjinn hefur spilað á Íslandi frá árinu 2010 en þá samdi hann við ÍA, hann var síðan keyptur til KR og fór þaðan í Víking. Eftir veru í atvinnumennsku kom Gary Martin aftur til Íslands árið 2019 og gekk í raðir Vals en var sendur þaðan í burt og fór til ÍBV.