Zinedine Zidane þjálfari Real Madrid segir að hann og leikmenn félagsins séu stoltir af tímabundnum heimavelli sínum. Þetta segir hann í svari til Jurgen Klopp stjóra Liverpool.

Real Madrid tók á móti Liverpool á Estadio Alfredo Di Stéfano í Meistaradeild Evrópu í fyrradag. Madrídingar byrjuðu leikinn töluvert betur, héldu boltanum vel og voru ógnandi við mark andstæðinganna. Þeir komust verðskuldað yfir 1-0 á 27. mínútu þegar Toni Kroos kom með frábæran bolta fram á Vinicius Jr. sem hann kassaði niður og kláraði snyrtilega framhjá Alisson í markinu.

Real tvöfölduðu forystu sína 10 mínútum síðar þegar Trent ætlaði að skalla boltann á Alisson í markinu en Asensio komst inn í sendinguna og kláraði auðveldlega. Liverpool litu aðeins betur út í byrjun seinni hálfleiks og Salah minnkaði muninn strax á 51. mínútu með skoti af stuttu færi eftir flotta sókn. Á 65. mínútu skoraði Vinícius annað mark sitt í leiknum og kom Real 3-1 yfir eftir að hafa sundurspilað vörn Liverpool. Þar við sat og ljóst er að Liverpool þurfa að vinna upp tveggja marka forystu í seinni leiknum á Anfield.

Leikurinn fór fram á æfingasvæði Real Madrid, engir áhorfendur geta mætt á völlinn og því ákvað félagið að ganga lengra í breytingum á heimavelli sínum, Santiago Bernabeu. Sökum þess leikur félagið á æfingasvæðinu. „Þetta verður flókið verkefni fyrir Real Madrid á Anfield,“ sagði Jurgen Klopp stjóri Liverpool eftir leikinn. „Þetta var furðulegt kvöld því þetta var mjög erfitt með þennan völl. Anfield er alvöru völlur og það verður gott fyrir okkur,“ sagði Klopp.

Zidane gefur lítið fyrir þessi ummæli Klopp. „Ég hef enga sterka skoðun á ummælum Klopp en við erum stoltir af þessum heimavelli okkar,“ sagði Zidane.

„Liverpool er andstæðingurinn, við vitum að þeir gefa allt í hvern leik. Þetta er ekki búið.“

Enski boltinn á 433 er í boði