Jadon Sancho var í stuði þegar Dortmund pakkaði Paderborn saman í þýsku úrvalsdeildinni í dag en Sancho skoraði þrennu.

Samúel Kári Friðjónsson var ekki í hóp hjá Paderborn en hann er meiddur.

Þegar Sancho skoraði sitt fyrsta mark fór hann úr treyjunni og birti skilaboð til George Floyd sem lést í Bandaríkjunum á dögunum.

„Ég næ ekki andanum.“ Var eitt af því síðasta sem maðurinn, hinn fertugi George Floyd, sagði á mánudaginn áður en hann lést. Hann lá þá ber að ofan á götu úti í Minneapolis. Búið var að handjárna hann en lögreglumaður hélt honum föstum á götunni með því að þrýsta hné sínu á háls hans og hnakka.

Atburðurinn var tekinn upp og hefur myndbandið vakið mikinn óhug en það hefur verið í mikilli dreifingu á netinu. Ekki sést á upptökunni hvað gerðist áður Floyd var handtekinn.

Paderborn 1 – 6 Borussia Dortmund:
0-1 Thorgan Hazard (’54 )
0-2 Jadon Sancho (’57 )
1-2 Uwe Hunemeier (’72) (Vítaspyrna)
1-3 Jadon Sancho (’74 )
1-4 Achraf Hakimi (’85 )
1-5 Marcel Schmelzer (89)
1-6 Jadon Sancho (’90 )