Gareth Bale er á förum frá Real Madrid á Spáni en þetta hefur stjóri spænska félagsins, Zinedine Zidane, staðfest.

Það er enn ekki víst hvaða félag er að tryggja sér þjónustu Bale sem er 30 ára gamall vængmaður.

Bale hefur lengi þótt vera einn besti vængmaður Evrópu en meiðsli hafa sett stórt strik í reikninginn.

Nú er talað um að Bale gæti orðið launahæsti leikmaður í sögu knattspyrnunnar en hann gæti farið til Kína.

Beijing Guoan er lið sem vill fá Bale í sínar raðir og er tilbúið að borga honum yfir um 950 þúsund pund á viku. Hann fær 600 þúsund á viku hjá Real.

Eezquiel Lavezzi er launahæsti leikmaður Kína í dag en hann fær 500 þúsund pund á viku hjá Hebei China Fortune.