Ólafur Jóhannesson, þjálfari Vals, fékk afsökunarbeiðni í Pepsi Max-mörkum gær. Hörður Magnússon sá um að biðja Ólaf afsökunar vegna viðtals sem var birt í þættinum eftir fjórðu umferð.
Áður en viðtalið sjálft hófst þá sagði Ólafur við fréttamann Stöð 2 að það mætti ekki spyrja út í mál framherjans Gary Martin. Framtíð Gary var í mikilli óvissu á þessum tíma en hann var svo leystur undan samningi stuttu síðar.
Í Pepsi Max-mörkunum var birt klippa af Ólafi þar sem hann bannaði blaðamanni að spyrja út í mál enska framherjans. ,,Við birtum það án þess að ígrunda það nægilega vel,“ sagði Hörður í þætti gærkvöldsins.
Helgi Seljan Jóhannsson, hjá RÚV gagnrýndi það að Hörður og félagar væru að biðjast afsökunar. „Af hverju eru #pepsimaxmörkin að biðja ÓJ afsökunar á því að hafa birt upptöku sem er tekinn á “viðtalssvæði” í Árbænum? Fyrir tveimur vikum var eðlilega sagt að ÓJ hefði ekkert dagskrárvald í þættinum, en svo þetta? Hvað gerðist?,“ sagði Helgi Seljan um málið á Twitter í gærkvöldi.
Hörður Magnússon, sem hefur stýrt skútunni í mörg ár útskýrði málið á Twitter í dag. „Einhverjir hissa á afsökunarbeiðni til Óla Jó. Það var ekki sanngjarnt gagnvart honum að birta það. Það breytir samt því ekki að hann getur ekki stjórnað um hvað er spurt. Svo mörg eru þau orð. #pepsimaxmörkin.“
Af hverju eru #pepsimaxmörkin að biðja ÓJ afsökunar á því að hafa birt upptöku sem er tekinn á “viðtalssvæði” í Árbænum? Fyrir tveimur vikum var eðlilega sagt að ÓJ hefði ekkert dagskrárvald í þættinum, en svo þetta? Hvað gerðist?
— Helgi Seljan Jóhannsson (@helgiseljan) June 2, 2019
Einhverjir hissa á afsökunarbeiðni til Óla Jó. Það var ekki sanngjarnt gagnvart honum að birta það. Það breytir samt því ekki að hann getur ekki stjórnað um hvað er spurt. Svo mörg eru þau orð. #pepsimaxmörkin
— Höddi Magg (@HoddiMagnusson) June 3, 2019