Íslensku bókmenntaverðlaunin voru afhent á Bessastöðum
Kristín Eiríksdóttir, Unnur Þóra Jökulsdóttir og Áslaug Jónsdóttir, Rakel Helmsdal og Kalle Güettler hljóta íslensku bókmenntaverðlaunin 2017. Þetta var tilkynnt við hátíðlega athöfn á Bessastöðum í kvöld, en það var forseti Íslands, Guðni Th. Jóhannesson, sem kynnti niðurstöður dómnefndar og afhenti verðlaunin. Fjögurra manna lokadómnefnd valdi verkin úr hópi fimmtán bóka sem tilnefndar voru til verðlaunanna í desember, en fimm bækur voru tilnefndar í hverjum flokki.
Í flokki barna- og ungmennabóka hlutu Áslaug Jónsdóttir, Rakel Helmsdal og Kalle Güettler verðlaunin fyrir bókina Skrímsli í vanda, sem er gefin út af Máli og menningu.
Í flokki fræðibóka hlaut Unnur Þóra Jökulsdóttir verðlaunin fyrir Undur Mývatns: -um fugla, flugur, fiska og fól, sem er gefin út af Máli og menningu.
Í flokki fagurbóka hlaut Kristín Eiríksdóttir verðlaunin fyrir skáldsöguna Elín, ýmislegt sem er gefin út af JPV.