Búast má við því að þeir fjölmörgu Rússar sem verða á áhorfendapöllunum á leik Íslands og Króatíu munu fylkja sér bak við íslenska liðið.

Ástæðan er nokkuð einföld; þrír leikmenn íslenska liðsins spila með liði FC Rostov en það spilar heimaleiki sína á Rostov Arena, sama velli og leikur Íslands og Króata fer fram á. Umræddir leikmenn eru þeir Ragnar Sigurðsson, Sverrir Ingi Ingason og Björn Bergmann Sigurðarson og er þeir í miklum metum hjá heimamönnum í Rostov.

„Ísland er þeirra annað lið. Ég held að við getum átt von á mjög góðum stuðningi frá Rússunum,“ segir Ragnar Sigurðsson í viðtali við spænska blaðið Marca.

Aðeins fjórtán leikmenn – utan leikmannahóps rússneska liðsins – á HM spila með rússneskum liðum og því er tenging íslenska liðsins við Rússland meiri en gengur og gerist. Rússarnir höfðu þó ákveðna ástæðu til að styðja við nígeríska liðið gegn Íslandi á dögunum en fyrirliði Nígeríu, John Obi Mikel, á rússneska kærustu.

„Það eru allir mjög almennilegir við okkur, á hótelinu sem og annars staðar. Rússarnir styðja okkur, ég veit ekki hvers vegna, en kannski er það vegna þess að kærasta mín er rússnesk,“ segir John Obi Mikel.

Ísland þarf á sigri gegn Króatíu að halda og það væri ekki ónýtt að fá stuðning frá þeim fjölmörgu Rússum sem verða á áhorfendapöllunum í Rostov á morgun.