Á föstudaginn var met sett hvað varðar fjölda flóttamanna sem komust til Bretlands yfir Ermarsund á litlum bátum. Þá náði fjöldinn 10.170. Á sama degi 2022 höfðu 9.326 komist yfir sundið og á síðasta ári höfðu 7.326 komist yfir sundið á þessum degi.

Sky News skýrir frá þessu og segir að flestir hafi komið 1. maí eða 711. Má rekja það til þess að í kringum mánaðamótin apríl/maí hefst tímabil þar sem betra er í sjóinn en yfir veturinn og því auðveldara að sigla á litlum bátum yfir sundið.

Rishi Sunak, forsætisráðherra, byggir pólitíska framtíð sína á því að taka á þessum mikla flóttamannastraumi og hefur ríkisstjórn hans meðal annars gripið til þess ráðs að semja við stjórnvöld í Rúanda um að taka við flóttafólki.

Hann hefur boðað til kosninga í byrjun júlí og segir að engir flóttamenn verði sendir til Rúanda fyrr en að þeim afstöðnum. En það er háð því að Íhaldsflokkurinn, flokkur Sunak, sigri í kosningunum því Verkamannaflokkurinn hefur heitið því að slaufa Rúanda-áætluninni algjörlega ef hann kemst til valda.

 Rúanda-áætlunin hefur verið lengi í undirbúningi en Sky News bendir á að ekki sé að sjá að hún hafi neinn fælingarmátt.