Þingmaður á breska þinginu var handtekinn í gær vegna gruns um nauðgun og vörslu fíkniefna. Þingmaðurinn tilheyrir Íhaldsflokknum og er í fréttum breskra fjölmiðla sagður áberandi (e. prominent) sem slíkur.

Breskir fjölmiðlar geta ekki nafngreint þingmanninn af lagalegum ástæðum. Lögreglan staðfestir að þingmaðurinn hafi verið látinn laus gegn tryggingu en að rannsókn málsins verði framhaldið.

Þetta er ekki fyrsta mál af þessu tagi sem kemur upp á meðal þingmanna undanfarin misseri. Annar sitjandi þingmaður Íhaldsflokksins var handtekinn í maí á síðasta ári vegna gruns um árás af kynferðislegum toga og nauðgun. Hann hefur ekki verið ákærður.

Tveir fyrrum þingmenn flokksins hafa verið dæmdir fyrir kynferðisbrot. Charlie Elphicke var dæmdur í tveggja ára fangelsi 2020 fyrir kynferðisbrot gegn tveimur konum. Imran Ahmad Khan var á síðasta ári dæmdur í 18 mánaða fangelsi fyrir að brjóta kynferðislega á 15 ára dreng.

Áður var venjan sú að forseti neðri deildar breska þingsins gerði það opinbert ef að þingmenn voru handteknir. Þessu var hætt árið 2016 þegar þingmenn samþykktu í atkvæðagreiðslu að ekki yrði skýrt frá því af hálfu þingsins ef einhver þeirra yrði handtekinn.

Fleiri hneykslismál af kynferðislegum toga hafa komið upp meðal þingmanna Íhaldsflokksins undanfarið. Peter Bone var fyrr í vikunni settur í sex vikna bann frá þinginu eftir að hann beraði sig fyrir aðstoðarmanni sínu sem sagði að langvarandi einelti af hálfu þingmannsins hefði haft afar skaðleg áhrif á andlega heilsu sína. Varaformaður þingflokksins Chris Pincher neyddist síðan til að segja af sér. Pincher var settur í tímabundið bann frá þinginu fyrir að káfa á tveimur karlmönnum. Hann áfrýjaði hins vegar refsingunni en áfrýjunin bar ekki árangur fyrir þingmanninn og því var ekki um annað að ræða en afsögn.

Það var Mirror sem greindi frá.

Uppfært kl 18:45

Sky News greinir frá því að þingmaðurinn Crispin Blunt hafi viðurkennt í færslu á samfélagsmiðlum að hann sé þingmaðurinn sem handtekinn var í gær. Hann segist sýna lögreglunni fulla samvinnu, handtakan hafi verið óþörf og hann eigi fastlega von á því að verða ekki ákærður.