Á morgun hefst næsti kafli í sápuóperunni um bresku konungsfjölskylduna. Þá hefjast sýningar á nýrri sex þátta heimildarmyndaþáttaröð hjá Netflix en þættirnir fjalla að stórum hluta um Harry prins og eiginkonu hans, Meghan.

Breskir fjölmiðlar segja að breska hirðin búi sig nú undir erfiða tíma og að verða dregin niður í svaðið þegar sýning þáttanna hefst.

Miðað við stiklurnar úr þáttunum þá verður þáttaröðin beinlínis stríðsyfirlýsing gegn konungsfjölskyldunni að mati breskra fjölmiðla.

„Það verður þörf fyrir loftvarnarbyrgi í Buckingham Palace, því þetta verður ljótt. Þau ætla að sprengja alla stofnunina og alla í henni í loft upp,“ skrifaði Hilary Rose í Times eftir að hafa séð stiklurnar.

Stiklurnar sýna að í þáttunum verður rætt um rasisma og óheiðarlegar aðferðir, til dæmis að leka sögum til fjölmiðla. „Þetta er óheiðarlegur leikur. Ég var skíthræddur. Ég vildi ekki að sagan myndi endurtaka sig. Enginn veit allan sannleikann. Við vitum allan sannleikann,“ segir Harry í stiklunum um leið og myndir af móður hans, Díönu prinsessu, renna yfir skjáinn.

Breskir fjölmiðlar reikna með að þættirnir muni eitra samband Harry og Vilhjálms, bróður hans, enn frekar. Þeir voru mjög nánir hér áður fyrr en talast ekki við núna og hafa ekki gert um langa hríð.

Það eru miklir peningar í spilinu en Sky News telur að samningar Harry og Meghan við Netflix og Spotify færi þeim sem nemur tæplegum tveimur milljörðum íslenskra króna í vasann.