Það var þann 8. mars 2014 sem vélin hvarf með öllum 239 farþegum og áhafnarmeðlimum innanborðs. Talið er að vélin hafi hrapað í sjóinn um 2.000 kílómetra frá vesturströnd Ástralíu. Þar, og raunar víðar, hefur verið leitað að flaki vélarinnar en án árangurs. Smávegis brak úr henni hefur rekið á land á nokkrum stöðum og er það það eina sem hefur fundist af henni.
Breski flugvélaverkfræðingur Richard Godfrey hefur fylgst vel með málinu frá upphafi og nú hefur hann sett fram nýja kenningu um örlög vélarinnar. News.com.au skýrir frá þessu.
Hann hefur rannsakað þær óreglulegu merkjasendingar sem bárust frá vélinni nóttina sem hún hvarf. Hann segir að á grundvelli þessarar rannsóknir þurfi að gera nýja leit að vélinni sem hann telur að sé einhvers staðar á um 300 ferkílómetra stóru hafsvæði. Áður hefur verið leitað á hluta af þessu svæði en ekki á hinum hlutanum.
Godfrey telur sig hafa gert nýja og hræðilega uppgötvun um flugleið vélarinnar. Hann telur að henni hafi ekki verið flogið beint heldur hafi henni margoft verið beygt um 360 gráður yfir Indlandshafi, svona eins og flugmenn gera þegar þeir bíða eftir að komast inn til lendingar á flugvöllum þar sem mikil flugumferð er.
Með þessu sáir hann efasemdum um kenninguna um að flugmennirnir, áhöfnin og farþegarnir hafi misst meðvitund og flugvélin síðan hrapað. „Kannski var flugstjórinn í samskiptum við ríkisstjórnina í Malasíu, hugsanlega var hann að kanna hvort önnur flugvél elti flugvélina hans eða kannski vildi hann bara taka sér tíma til að ákveða sig,“ segir Godfrey og kyndir þar með undir kenningu um að flugstjórinn hafi viljandi látið flugvélina hrapa.
Þegar Peter Foley, forstjóri áströlsku samgöngustofunnar og stjórnandi leitarinnar að flugi MH-370, var spurður að því í fréttaþættinum 60 mínútum hvort það væri líklegt að flugstjórinn hafi staðið á bak við þetta og þannig framið fjöldamorð sagði hann það alls ekki útilokað. Hann sagðist telja að kenning Godfrey geti vel veitt ástæðu til að leita enn einu sinni að vélinni.
