Vestrænar leyniþjónustustofnanir taka alltaf við sér þegar einræðisherrann tilkynnir að nú hafi þjóð hans smíðað nýjar kjarnorkusprengjur eða langdrægar eldflaugar. En þær hafa einnig áhuga á heilsufari leiðtogans því hann fer með öll völd í landinu og heldur þjóðinni í heljargreipum.
En þrátt fyrir að leiðtoginn hafi grennst er ekki þar með sagt að hann sé horaður en það er óumdeilanlega mun minna af honum nú en í upphafi árs. En hvað veldur þessu? Veikindi? Lífshættulegur hjarta- og æðasjúkdómur eða grenntist hann af ásettu ráði til að draga úr þeim mun sem var á líkamsvexti hans og þjáðrar þjóðar hans? Flestir landsmenn glíma við það vandamál að fá ekki nóg að borða en leiðtoginn hefur greinilega fengið of mikið að borða miðað við vaxtarlag hans.
Í desember verða tíu ár liðin síðan Kim Jong-un tók við völdum í landinu, aðeins 27 ára, eftir að faðir hans lést af völdum hjartaáfalls, hugsanlega vegna ofþyngdar. Þegar Kim Jong-un tók við völdum er hann talinn hafa vegið 90 kíló. Á næstu árum bætti hann sífellt á sig. Suðurkóreskir sérfræðingar töldu þetta vera gert af meðvituðum hætti því hann hafi viljað líkjast föður sínum og afa, Kim Il-sung, sem stofnaði landið. Þeir feðgarnir voru engar horgrindur.
Áður en hann grenntist er talið að hann hafi vegið um 140 kíló þegar verst lét en það var 2019. Hann er 170 cm á hæð svo BMI-stuðull hans var miklu hærri en læknar myndu mæla með. Suðurkóreskir leyniþjónustumenn telja að hann hafi nú lést um 20 kíló en þeir byggja það á ljósmyndum af honum.
