Bretar glíma við risavaxið vandamál þessa dagana. Við útgöngu þeirra úr ESB hurfu 25.000 erlendir flutningabílstjórar á brott. Þetta veldur því að illa gengur að dreifa matvælum, eldsneyti og öðrum nauðsynjavörum. Nú er staðan orðin svo alvarleg að ríkisstjórn Boris Johnson íhugar að kalla herinn til starfa og láta hann taka að sér að dreifa olíu, mjólk og öðrum nauðsynjavörum til bensínstöðva og verslana um allt land.

Margar bensínstöðvar eru orðnar uppiskroppa með bensín og hafa bíleigendur hamstrað bensín síðustu daga. Hillur eru tómar í mörgum verslunum og útflytjendur eiga erfitt með að koma framleiðslu sinni frá sér vegna skorts á flutningabílstjórum. Mikill þrýstingur er á ríkisstjórnina um að grípa til aðgerða vegna þessa. Grans Shapps, samgöngumálaráðherra, sagði augljóst að sé staðan þannig að það gagnist að kalla herinn til aðstoðar þá verði það gert.

Segja má að eitruð blanda herji á Breta þessa dagana, Brexit, mikill skortur á náttúrugasi, vaxandi verðbólga og skortur á flutningabílstjórum gera þeim mjög erfitt fyrir. Samkvæmt fréttum breskra miðla í morgun þá er um þriðjungur bensínstöðva orðinn uppiskroppa með bensín. Samtök bensínstöðva sögðu í morgun að 50 til 90% bensínstöðva í landinu séu að verða uppiskroppa með bensín.

Um helgina var tilkynnt að gefin verði út rúmlega 10.000 bráðabirgðaatvinnuleyfi fyrir bílstjóra frá ESB til að bæta ástandið. Gagnrýnendur segja að það dugi engan veginn til, þörf sé á miklu fleiri bílstjórum.

Stórverslanir og bændur hafa mánuðum saman reynt að vekja athygli á að skortur á bílstjórum geti orðið að risastóru vandamáli. Breskir fjölmiðlar hafa sagt að ekki sé útilokað að jólin verði hörmuleg því bæði muni skorta mat og eldsneyti. Fram hefur komið að nú vanti 90.000 flutningabílstjóra til starfa í landinu.