Á mánudaginn fékk lögreglan í Andover í New Jersey í Bandaríkjunum nafnlausa ábendingu um að lík væri falið við eitt stærsta elliheimili ríkisins. Lögreglan fór á vettvang og kannaði málið en fann ekkert athugavert nærri elliheimilinu. Því næst fóru lögreglumenn inn í húsið og þá mætti þeim hryllingur einn.

New York Times skýrir frá þessu. Í litlu líkhúsi, sem er gert fyrir fjögur lík að hámarki, fundu lögreglumenn 17 lík. Þetta voru lík hluta þeirra 68 sem hafa látist á Andover Subacute and Rehabilitation Center 1 og 2. Meðal hinna látnu voru tveir hjúkrunarfræðingar.

26 af þeim sem hafa látist höfðu greinst með COVID-19 veiruna. Ekki er vitað um dánarorsök hinna. New York Times segir að margir íbúar elliheimilisins og starfsmenn séu smitaðir af veirunni.

Á elliheimilinu er rými fyrir rúmlega 700 manns.

Eric C. Danielson, lögreglustjóri í Andover, sagði í samtali við New York Times að það hafi verið hræðilegt að sjá öll líkin. Forsvarsmenn elliheimilisins báðu um fleiri líkpoka um síðustu helgi til að geta geymt lík á heimilinu.