Belle hafði alla tíð talið að hún hefði verið ættleidd af kjörforeldrum sínum þegar hún var kornabarn en sannleikurinn var flóknari en svo. Hún skýrði nýlega frá þessu í viðtali við The Sun. Það var staðreynd að hún hafði verið ættleidd en sagan á bak við ættleiðinguna var ekki alveg eins og henni hafði verið sagt.
Belle, sem ólst upp í Utah, vissi strax frá unga aldri að hún skar sig úr. Hún var dökkhærð með krullur en foreldrar hennar ljóshærðir. Þegar hún var átta ára sögðu foreldrar hennar henni að þau hefðu ættleitt hana frá Rúmeníu og að líffræðilegir foreldrar hennar hefðu ekki viljað hafa hana.
Eftir því sem árin liðu slitnaði upp úr sambandi Belle við kjörforeldra sína og sú hugsun sótti alltaf á hana að hún vildi vita meira um uppruna sinn. Í júní á síðasta ári fann hún Facebookhóp sem hefur það að markmiði að aðstoða ættleidda Rúmena við að hafa upp á líffræðilegum foreldrum sínum og fjölskyldum. „Ég var taugaóstyrk þegar ég deildi aldri mínum og nafni og ég var hissa þegar ég fékk svar nær samstundis,“ sagði hún í samtali við The Sun.
Einn af stjórnendum hópsins þekkti sjaldgæft eftirnafn Belle og eftir aðeins 48 klukkustundir var Belle komin í samband við ungan mann, Moise, sem reyndist vera yngri bróðir hennar. Hann sagði henni að hún ætti tvær eldri systur og að foreldrar þeirra, Margari og Zambila, búi nú nærri Róm á Ítalíu. Þremur vikum síðar ræddi hún við móður sína í síma með aðstoð túlks. Þá heyrði hún loksins réttu útgáfuna af hvernig hún endaði í Bandaríkjunum.
Þegar hún fæddist 1994 voru foreldrar hennar mjög fátækir og bjuggu í tjöldum. Læknar sögðu þeim að Belle væri mjög veik þegar hún fæddist og var hún því lögð inn á sjúkrahús en foreldrarnir sendir heima. Þegar þau komu aftur var þeim sagt að hún hefði dáið. Á leið út af sjúkrahúsinu sagði hjúkrunarfræðingur þeim að Belle hefði verið rænt og hún seld. Þar hefðu líklegast skipulögð glæpasamtök verið að verki. Foreldrarnir reyndu mánuðum saman að hafa uppi á henni en án árangurs og að lokum neyddust þau til að gefast upp.
„Hún sagði stöðugt „afsakið“ og að þau hefðu reynt að finna mig. Að þau hefðu beðið fyrir mér daglega,“ sagði Belle við The Sun.
Hún komst síðan í samband við samtökin Operation Underground Railroad sem aðstoða fórnarlömb mansals. Samtökin sáu til þess að dna-sýni voru tekin úr Belle og fjölskyldu hennar til að hægt væri að staðfesta að þau væru skyld og svo reyndist vera. Í nóvember á síðasta ári hitti Belle síðan fjölskyldu sína á nýjan leik.
Operation Underground Railroad gerðu myndbandið hér fyrir neðan en þar er Belle í aðalhlutverki.
