„Þú deyrð líklega ekki af að fletta þeim en við teljum að ef þú myndir vilja borða þær þá innihaldi þær nægilega mikið arsen til að drepa 60 manns.“ Þetta segir Bertil Dorch, yfirbókavörður á bókasafni Syddansk háskólans í Danmörku um þrjár bækur sem safnið á. Þær eru geymdar á læstum stað.

Starfsmenn háskólans uppgötvuðu fyrir tæpum þremur árum fyrir tilviljun að bækurnar væru eitraðar. Nú hafa fleiri eitraðar bækur fundist en að þessu sinni vestan Atlantshafs. Á Smithsonian bókasafninu í Washington fannst nýlega ein bók sem inniheldur arsen en það er á forsíðu hennar. Allie Alvis, bókasafnsfræðingur, hafði engan grun um að bókin væri eitruð en það var einmitt þessi bók sem hún var vön að draga fram fyrir gesti þegar sýna átti þeim gamla og sjaldgæfa bók.

„Þetta var spennandi en líka óhugnanlegt því við vissum ekki hvað var mikið af arseni.“

Segir Alvis um málið.

Sérfræðingar telja líklegt að miklu fleiri eitraðar bækur sé að finna í Danmörku og mörgum öðrum löndum. Þær geta bæði verið á almenningsbókasöfnum og í einkasöfnum.

Í Washington er nú verið að gera lista yfir bækur sem eru hugsanlega eitraðar. Alvis er nú þegar komin með átta bækur á þann lista og verða þær rannsakaðar ítarlega.