Ali Rhigh-Aghsan, doktor í stjórnmálafræði og sérfræðingur í málefnum Íran, sagði í samtali við Ekstra Bladet að af þessum sökum ætti fólk að forðast að ferðast til Íran. Erfitt sé að segja til um hvað þurfi til að yfirvöld ákveði að handtaka ferðamenn.
Nú sitja tveir ástralskir ferðamenn, karl og kona, í fangelsi í Íran grunuð um njósnir og hafa setið þar mánuðum saman. Þau tóku dróna með sér til landsins til að nota við myndatökur og það er ekki skynsamlegt að mati Aghsan því herinn og leyniþjónustan fylgist með öllu sem ferðamenn gera og líði ekki notkun dróna.
Hann sagði að njósnir séu í hæsta forgangi hjá írönskum yfirvöldum og að þar sé litið á alla frá Vesturlöndum sem óvini og því sé fylgst vel með þeim. Hann sagði einnig að írönsk stjórnvöld hafi áratugum saman stundað það að fangelsa útlendinga til að tryggja samningsstöðu í framtíðarviðræðum við erlend ríki. Með tilliti til stöðunnar í Íran sagðist hann ráðleggja fólki að fara ekki þangað, það sé of hættulegt.