Donald Trump, forseti Bandaríkjanna, lagði til að kjarnorkusprengjur yrðu notaðar til að draga úr þeirri miklu hættu sem getur myndast þegar fellibyljir ganga á land.

Þetta kemur fram í umfjöllun Axios sem hefur þetta eftir heimildarmönnum sínum.

Trump er sagður hafa viðrað þessa hugmynd oftar en einu sinni og hvatt þá sem fara með þjóðaröryggismál að skoða þennan möguleika vandlega. Er Trump sagður hafa viljað varpa sprengju í miðju fellibylsins með það fyrir augum að hreinlega splundra honum.

Í umfjöllun Axios kemur fram að þessi hugmynd sé ekki ný af nálinni og hún hafi raunar fyrst komið fram í forsetatíð Dwights Eisenhower á sjötta áratug tuttugustu aldar.

Þessi hugmynd þykir býsna stórkarlaleg en þess utan er engin fullvissa um að aðgerð sem þessi myndi skila tilætluðum árangri. Í umfjöllun Axios er einnig bent á þau miklu umhverfisáhrif sem kjarnorkuvopn hafa. Afleiðingarnar yrðu aukin geislun sem myndi hafa mikil og varanleg áhrif, til dæmis á lífríki sjávar.