Í Nepal er hefð fyrir því að konum og stúlkum sé útskúfað, tímabundið, úr samfélaginu á meðan þær eru á blæðingum.  Ung kona, Parwati Bogati, lést á dögunum eftir veru í svokölluðum blæðingakofa, en talið er að hún hafi kafnað eftir að kveikja eld í kofanum til að verma sér við.  Frá þessu er greint í Kathmandu Post.

Hefðin, sem kallast Chhaupadi, felst í því að konum sem hafa nýverið fætt barn eða eru á blæðingum er gert að yfirgefa heimili sín þar til blæðingunni líkur. Blæðandi konur eru taldar ósnertanlegar og óhreinar og talið að þær kalli ógæfu yfir fjölskylduna, fái þær að dvelja, blæðandi, á heimilum sínum. Yfirvöld í Nepal bönnuðu Chhaupadi árið 2005 og fylgdu því svo eftir árið 2017 þegar brot gegn banninu var gert refsivert. Þrátt fyrir þetta lifir hefðin enn góðu lífi og ekki þykir fátítt að konur verið fyrir árásum og láti jafnvel lífið á meðan þær dvelja í blæðingarkofum.

„Sama hvað þá leyfir samfélagið okkar ekki konum að sofa heima hjá sér á meðan á blæðingum stendur,“ sagði Laxmi, tengdamóðir Parwati, en það var hún sem kom að tengdadóttur sinni látinni.

Í janúar lét móðir ásamt tveimur börnum sínum lífið eftir veru í blæðingarkofa og í júní í fyrra lést táningur eftir að eiturslanga beit hana á meðan hún var í mánaðarlegri túr-útskúfun.

Íhaldssamt fólk í samfélögum í Nepal hefur ekki viljað láta af þessari háttsemi, þrátt fyrir að fangelsisvist og sektir liggi við broti gegn banninu. Þeir telja að guð verði reittur til reiði, snerti blæðandi kona karlmann, eða komi inn í eldhús og musteri.