Voðaverkið í Kaliforníu: Átti að komast á eftirlaun eftir ár en var skotinn til bana í nótt
Lögreglumaðurinn sem var skotinn til bana í skotárásinni í Thousand Oaks í Kaliforníu í nótt hét Ron Helus. Minnst tólf voru skotnir til bana á veitingastaðnum Borderline Bar & Grill áður en árásarmaðurinn var felldur af lögreglunni.
Ron Helus er einn þeirra lögregluþjóna sem mættu fyrstir á vettvang. Hann var skotinn mörgum skotum eftir að hann fór inn á veitingastaðinn í þeirri von að yfirbuga byssumanninn. Geodd Dean, lögreglustjóri í Ventura-sýslu, sagði rétt í þessu að Helus hefði dáið sem hetja. „Hann fór þarna inn til að bjarga fólki.“
Helus hafði starfað sem lögregluþjónn í tæp þrjátíu ár og skilur hann eftir sig eiginkonu og son. Hann hugðist fara á eftirlaun á næsta ári.
Helus fór á staðinn ásamt öðrum lögreglumanni en var skotinn um leið og hann gekk inn. Félagi hans dró hann burt og var Helus fluttur alvarlega slasaður á sjúkrahús. Hann lést af sárum sínum í morgun.
Margir voru inni á staðnum – einkum ungt fólk – þegar árásin var framin og eru margir hinna látnu undir tvítugt. Minnst tíu voru fluttir á sjúkrahús eftir árásina.