Á síðasta ári samþykkti ítalska þingið að skylda foreldra til að láta bólusetja börn sín, að öðrum kosti áttu börnin ekki að fá að fara í skóla. Ástæðan var að Ítalía hefur skorið sig mikið úr í Evrópu hvað varðar fjölda mislingatilfella en þau hafa verið mjög mörg þar á undanförnum árum vegna lágs hlutfalls bólusettra.

Roberto Burioni, sérfræðingur í veirufræði við San Raffaele háskólann í Mílanó, segir að hlutfall bólusettra á Ítalíu hafi verið álíka og í Namibíu og lægra en í Gana.

En nú eru breyttir tímar á Ítalíu þar sem Fimmstjörnuhreyfingin og Lega sitja við stjórnvölinn. Flokkarnir hafa nú afnumið bólusetningarlögin.

„Tíu skyldubólusetningar eru gagnslausar og í mörgum tilfellum hættulegar ef ekki skaðlegar. Ég staðfesti að öll börn fá að ganga í skóla.“

Sagði Matteo Salvini, innanríkisráðherra, í kjölfar lagabreytingarinnar.

Burioni er ekki sammála Salvini og hefur The New York Times eftir honum að það sé sjálfseyðandi taktík að veikja lög, sem virka, sem Ítalir virða og lög sem gagnast börnum og heilbrigðiskrefinu.

Vísindamenn óttast að afnám laganna kyndi undir vantrú á vísindum og ógni heilbrigði barna. Á síðasta ári greindust 5.004 mislingasmit á Ítalíu eða 34 prósent af öllum tilfellum í Evrópu. 89 prósent smitanna voru hjá fólki sem ekki hafði verið bólusett.