Leik- og söngkonan Bette Midler segist dauðsjá eftir því að hafa ekki lögsótt Lindsay Lohan á árum áður. Ummælin hafa vakið nokkra athygli enda var Lohan aðeins 14 ára gömul þegar umrætt atvik átti sér stað.

Midler, sem er orðin 78 ára gömul, var til viðtals í hlaðvarpsþætti X-files-stjörnunnar fyrrverandi, David Duchovny. Hlaðvarpsþættirnir heita Fail Betterpodcast en í viðtalinu við Midler rifjað hún upp nokkur atvik sem hún sér eftir frá sínum langa ferli.

Eitt af því er að hafa ekki lögsótt Lindsay Lohan þegar hún dró sig út úr sjónvarpsþáttum sem Midler framleiddi. Lohan hafði skrifað undir samning um að leika dóttur Midler í þáttunum sem hétu einfaldlega Bette. Hún tók hins vegar aðeins þátt í pilot-þættinum en hætti svo snarlega við. Svo fór að þættirnir, sem frumsýndir voru árið 2000, misheppnuðust herfilega. Aðeins voru framleiddir 18 þættir og var þeim slaufað eftir eina þáttaröð.

Midler segir að brotthvarf Lohan hafi einfaldlega riðlað allri framleiðslunni og valdið henni miklu tjóni. „Ef ég hefði verið með réttu ráði eða áttað mig á að ég hefði þurft að standa upp láta heyra í mér, þá hefði ég gert það,“ segir Midler í viðtalinu.

Þó brotthvarf Lohan hafi verið stór þáttur í lestarslysinu sem þættirnir voru þá var það ekki eini vandinn. Hraðinn í framleiðslunni hentaði ekki Midler og hún átti erfitt með að hafa áhrif á handrit þáttanna þó hún væri einn framleiðandi þáttanna. Allt sem gat farið úrskeiðis fór úrskeiðis.