Klukkan 01.34 var tilkynnt um eld í iðnaðarhúsnæði í Norrköping í Svíþjóð. Tilkynnandi hafði heyrt kallað á hjálp frá húsinu. Þegar lögreglumenn komu á vettvang sáu þeir mann hanga út um glugga á byggingunni og kalla á hjálp. Hann reyndist vera bundinn fastur. Lögreglumönnum tókst að losa manninn og bjarga honum út úr byggingunni.

Efri hluti líkama mannsins hékk út um gluggann og segir lögreglan að ekki sé annað að sjá en einhver hafi bundið hann fastan. Það þarf því ekki að koma á óvart að málið er rannsakað sem morðtilraun.

Mikill eldur logaði í byggingunni og það var ekki fyrr en á fjórða tímanum sem slökkvilið náði tökum á eldinum. Eldur logaði víða í húsinu og ljóst þykir að kveikt hafi verið í því.

Ekki er enn vitað hversu alvarlega maðurinn slasaðist en hann var fluttur á sjúkrahús segir í frétt Sænska ríkisútvarpsins.