Penninn-Eymundsson, Mál og Menning og A4 hafa hækkað verð á milli ára á flestum nýjum námsbókum sem fáanlegar voru í könnunum verðlagseftirlits ASÍ í ár og í fyrra. Þetta kemur fram í tilkynningu frá ASÍ. Þar segir enn fremur að bókabúðin Iðnú lækki hins vegar verð á öllum titlum sem skoðaðir voru frá fyrra ári.
Penninn-Eymundsson hækkar námsbækur fyrir framhaldsskóla í flestum tilfellum um og yfir 65 prósent milli ára og hjá A4 hækkar verðið í flestum tilfellum um 30-50 prósent. Mest var verðhækkunin á „Almenn jarðfræði“ hjá A4 eða úr 4.199 kr. í fyrra í 8.289 kr. sem gerir hækkun um 4.090 kr., eða 97 prósent. Næst mesta hækkunin var á „Bókfærsla 1“ hjá Pennanum-Eymundsson en sú bók hækkaði úr 2.909 kr. í 5.599 kr., eða um 2.690 kr., eða 92 prósent.
Verðið lækkaði hins vegar hjá Bókabúðinni Iðnú um 15–25 prósent á milli ára. Mesta verðlækkunin í samanburðinum var á „Lífeðlisfræði“ hjá Forlaginu Fiskislóð um 32 prósent, sú bók lækkaði úr 8.590 kr. í 5.884 kr.
Að sögn ASÍ voru borin saman verð á nýjum námsbókum fyrir framhaldsskóla í könnunum verðlagseftirlits ASÍ þann 16. ágúst 2016 og 10. ágúst 2017. Áréttað er að tekin eru niður þau verð sem eru í gildi á hverjum tíma og hafa tilboðsverð áhrif á samanburð. Penninn-Eymundsson og A4 voru með 25 prósenta afslátt af nýjum bókum þegar könnunin fór fram 2016 og Bókabúðin Iðnú með 15 prósenta afslátt þegar könnun fór fram 2017.
Í báðum könnunum var kannað verð í eftirtöldum verslunum: Pennanum-Eymundsson Kringlunni, A4 Skeifunni, Forlaginu Fiskislóð, Bókabúðinni Iðnú Brautarholti, Mál og Menningu Laugavegi og á Heimkaup.is.
Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila. Einnig má benda neytendum á að bókabúðirnar gætu verið með staðgreiðsluafslátt og jafnvel afslætti til meðlima.
