Það er kominn mánudagur og þá er spurning hvað á að vera í matinn. Hér er einn ótrúlega ljúffengur pastaréttur sem er frábær mánudagsréttur í kósí heitum meðan við teljum niður í jólin.

Besta við þennan pastarétt er að það tekur aðeins um 20 mínútur að útbúa þennan rétt sem skemmir heldur ekki fyrir og svo er hann hrikalega ljúffengur, hrein ostaveisla og svo er brauðið svo gott. Berglind Hreiðars okkar hjá Gotterí og gersemum á heiðurinn af þessum mánudagsrétti.

Ostapasta með ostabrauði

Ostapasta

400 g pasta að eigin ósk

250 g chilli- og ostapylsur

1 laukur

2 rifin hvítlauksrif

350 ml rjómi frá Gott í matinn

180 g 4 osta blanda frá Gott í matinn

Salt, pipar og hvítlauksduft

Timian

Ólífuolía til steikingar

Sjóðið pasta samkvæmt leiðbeiningum á pakka. Skerið niður pylsur og lauk og steikið upp úr ólífuolíu. Bætið hvítlauknum saman við í lokin og steikið þar til mýkist. Hellið rjómanum á pönnuna ásamt ostinum og hrærið þar til osturinn er bráðinn. Kryddið til eftir smekk og blandið pastanu varlega saman við í lokin. Toppið með fersku timian og njótið með ostabrauði (sjá uppskrift hér að neðan).

Ostabrauð

1 stk. súrdeigs baguette

Íslenskt smjör

Hvítlauksduft

4 osta blanda frá Gott í matinn

Byrjið á að hitta ofninn í 200°C. Skerið brauðið í sneiðar. Sneiðið smjör með ostaskera og leggið smjörsneið á hverja brauðsneið. Kryddið aðeins með hvítlauksdufti og stráið vel af 4 osta blöndu yfir hverja sneið. Setjið í ofninn í nokkrar mínútur eða þar til osturinn bráðnar og brauðið fer aðeins að gyllast (3-5 mínútur).

Njótið við kertaljós og huggulegheit.