Hanna Þóra Helgadóttir er 31 árs flugfreyja hjá Icelandair og matarbloggari. Hún hefur verið á ketó í 20 mánuði og aldrei liðið betur. Hún er dugleg að deila uppskriftum á Instagram, @hannathora88, og Fagurkerar.is
„Ég ákvað að prófa þennan lífsstíl og gefa honum 21 dag til að byrja með. Eftir þessar þrjár vikur var hreinlega ekki aftur snúið. Öll aukna orkan, bjúgurinn sem hvarf og verkir í líkamanum sem voru ekki velkomnir aftur,“ segir Hanna Þóra.
Hanna Þóra hefur alla tíð verið dugleg í eldhúsinu. Það breyttist ekki eftir að hún fór á ketó. Hún skipti út hráefnum og segir það vera lítið mál.
„Munurinn á ketó matargerð og öðru sem ég var að gera áður er aðallega sá að sykur, hveiti og önnur kolvetnarík innihaldsefni er ekki lengur í skúffum og skápum heldur vel ég aðra kosti sem henta þessum lífsstíl og hafa minni áhrif á blóðsykurinn. Hveiti hefur heldur ekki farið vel í mig í gegnum tíðina þannig að það var lítið mál að sleppa því um leið og maður fann sniðugar uppskriftir og hráefni til að nota í staðinn,“ segir hún.
Að sögn Hönnu Þóru eru alls konar mýtur í gangi varðandi ketó.
„Ein af þeim er að það sé ekki hægt að vera á þessu mataræði til lengri tíma. Mín líðan hefur breyst stórkostlega síðan ég breytti um lífsstíl en ég held að hver og einn þurfi alltaf að finna sína hillu og við erum ekki öll eins. Það sem hentar einum hentar ekki endilega næsta manni,“ segir hún og bætir við:
„En við getum öll verið sammála um að góður matur gefur lífinu svo sannarlega lit og það er mitt mottó í lífinu að borða einungis góðan mat. – Ég stend við það á hverjum einasta degi og fæ innblástur í matargerð úr ýmsum áttum.“
