Sat Bains, einn þekktasti kokkur Bretlandseyja, segist aldrei ætla að setja veganmat á matseðilinn á veitingastað sínum í Nottinghamskíri. Um er að ræða veitingastað sem hefur fengið tvær Michelin-stjörnur, en staðurinn opnaði fyrir 18 árum.

Í samtali við Mail Online segir Bains að hann vilji – og þurfi – að halda ákveðnum staðli við matreiðsluna. Gríðarleg vinna sé lögð í hvern rétt og aðeins besta mögulega hráefni notað til að ná fram hinu fullkomna bragði.

Þetta þýði að ekki sé hægt að útiloka ákveðin matvæli því það komi á endanum niður á bragðinu. Þá sé hráefnið almennt ódýrt sem notað er í veganmat.

„Við viljum gefa viðskiptavinum okkar besta mat sem völ er á,“ segir hann og bætir við að það sé ágætt að halda því til haga að fólk viti hvað það fær þegar það heimsækir staðinn. Sjálfur færi hann ekki á veganveitingastað og myndi biðja um kjöt.

„Þú ferð ekki á þungarokkstónleika og reiknar með að heyra klassíska tónlist. Þetta er minn veitingastaður og mitt viðskiptamódel og ég geri það sem ég vil,“ segir hann.