Nú hef ég eldað kalkún á þakkargjörð og á jólum í 25 ár með góðum árangri og orðin heldur vanaföst með aðferð og fyllingu, en ketó útgáfan mín sló öll met og er betri en þessi hefðbundna.
Ég var vön að baka kornbrauð eins og hún systir mín í Ameríkunni en geri nú einskonar „fathead“ útgáfu sem er ekki síðri og ef eitthvað er heldur sér betur í grautnum sem fyllingin er.
Fyllingin er uppáhaldið mitt og ég get borðað hana eintóma með sósunni. Ég baka hana alltaf til hliðar í sérfati en fylli fuglinn af klementínum og kryddjurtum.
Brauð – Hráefni:
1½ bolli rifinn ostur
60 g rjómaostur
1 1/3 bolli möndlumjól
2 msk. kókoshveiti
2 msk. fínmöluð sæta
1½ msk. lyftiduft
2 egg
Aðferð:
Bræða saman rifinn ost og rjómaost í 30 sekúndur í senn í örbylgjuofni. Hræra á milli þar til allt er blandað. Hræra svo restinni af hráefnum saman við. Baka á 180 gráðum í 20 mínútur. Ég nota smelluform og einnig er gott að pensla brauðið með eggi áður en það er bakað til að fá fallegri skorpu.
Svo er brauðið skorið í teninga og því leyft að þorna helst yfir nóttu til að það draga betur í sig djúsinn úr fyllingunni.
Fyllingin – Hráefni:
ca. 800 g grísahakk
2 teningar nautakraftur
salt/pipar
Worcestershire sósa
Chipotle adobo eða Sriracha sósa (má sleppa en mér finnst gott að hafa brodd í fyllingunni)
1 laukur
4-5 stilkar sellerý
3 hvítlaukslauf
1 rauð paprika, smátt skorin
salvía
pekanhnetur
Aðferð:
Brúna hakkið og krydda og mýkja grænmetið á pönnu í miklu smjöri. Blanda svo öllu saman við brauðteningana í stórri skál og bleyta upp í með 1 bolla af soði. Baka í stóru fati á 190 gráðum í ca. 30 mín eða þar til toppurinn fer að gyllast.
Gleðilegt nýtt ár allir saman!
May the keto force be with you!
